拳王泰國餐廳刺激你的視覺與味道

早前係銅鑼灣等朋友收工的時候，比幾位靚仔泰拳教練捉住問我地有無興趣學泰拳，我地就順勢問返佢地附近有無泰國餐廳好食，跟住佢地就指住前面一間叫做拳王泰國餐廳，仲話係佢地學校同一集團開嘅，話好好食，咁我同個朋友又唔知食咩好，於是就入去試下。

入到裡面全部都係同泰拳有關嘅佈置，連張櫈都係沙包形，又真係同一般泰國餐廳好唔同。而且一路仲播住泰拳比賽錄影片段，感覺自己好似去學泰拳多過食飯，哈哈。

牆壁佈置都好特別，有好多唔同泰拳比賽得獎腰帶，仲有埋漫畫介紹添，視覺方面又有另一番新感受。

晚市時間都好多客人幫襯，感覺好似都唔錯，所以覺得個幾個靚仔又真係無坤我地。

餐牌設計都好花心思，而且色彩繽紛，好似睇漫畫書的感覺，睇得出餐廳老闆真係好熱愛泰拳。

頭盆方面想自己開胃D，於是點左金柚蝦沙律，平時出面食泰式沙律好多時都會遇到柚子有苦澀味，但呢度係用金柚所以味道係好清甜架，所以我第一次感覺到泰式都可以好好食。而蝦就得4隻，不過都算幾大隻，而且蝦肉好鮮味同爽脆，整體黎講我真係好鍾意。

見隔離枱有幾張都有點泰國海南雞，於是我地都好想試下有幾特別所以就叫左半隻。呢度嘅海南雞特別之處在於佢係用蒸籠上菜，我真係第一次係泰國餐廳見到蒸籠呢樣野，覺得有中泰合壁嘅感覺。

餐廳服務員好友善咁行埋黎話比我地知呢個海南雞食之前係要將上湯淋上D雞肉上面先。雞肉好新鮮，而且啖啖肉，重點係超嫩滑，呢個超級推介，一定要食﹗

燒豬頸肉係我至愛，去親邊一間泰國餐廳我都一定要食，味道當然都係一流，因此燒豬頸肉好難整得唔好食。呢度特點可以話係份量多，豬頸肉燒得岩岩好，好脆口，而且又嫩滑多汁。

食飽飽，當然又係甜品時間，今日食得太多肉，要叫返D水果清一清返味覺。見到有燒菠蘿，於是叫左3片。開頭仲以為細細片唔多夠，點知一塊超厚，味道好清甜，而且用上新鮮菠蘿，感覺好Fresh。