2022年5月31日 星期二

自從疫情以來,其實我已經好少化妝出街,最多都係搽少少粉底,等自己個樣望落精神一啲。最近適逢2022年 SOGO THANKFUL WEEK ,見到我用開嘅 TOM FORD  明星氣墊粉底推出咗套裝優惠,所以最後都受唔住誘惑,入手咗一套當獎勵自己。


TOM FORD  明星氣墊粉底套裝,價錢由 HK$805至 HK$1,095 (原價$1,335至1,625),大約有6折,平時真係唔太捨得買,所以我每次都會襯 SOGO THANKFUL WEEK 先入手,真係慳返好多錢,買多啲都唔會肉痛。



TOM FORD  明星氣墊粉底套裝包括:
1. 自選一款明星氣墊粉底套裝 
2. 限量版氣墊粉底盒 
3. 限量版氣墊粉底皮套

限量版有金色盒同紅色盒,我兩款盒都有買過,金色盒會重少少,手感好啲;紅色盒就輕少少,會比較淑女啲。而且每一盒明星氣墊粉底都會有皮套,可以用嚟保護個case,放喺手袋都唔會咁易刮花同整污糟,真係好貼心呀﹗


套裝仲會包埋粉芯同粉撲,有唔同色澤可選,大家可以去專櫃試啱色先買。




每次按壓都唔會太多份量,而且用少少已經可以覆蓋全面,個粉撲仲可以令到粉底好貼服,我用足一年都無變型同損壞,非常耐用。



TOM FORD最熱賣嘅明星氣墊粉底,可以令你帶住完美肌膚出門,藴含強效補濕的營養成份,不但滋潤肌膚,其高效防曬精華更能夠提供極致保護,令肌膚透現自然光采。另外,配方入面含有高效防曬 SPF 45 /PA++++ 及多種強效抗氧化成份有效保護肌膚,免受陽光及環境侵害。



Tom Ford 明星氣墊粉底質地好易推,貼服又持妝,用完唔厚粉之餘仲充滿光澤感添﹗遮瑕度屬於中上,可以遮到毛孔、紅印同色斑。出完一日街返到屋企,膚色都無變黃或者變灰,而且控油功效唔錯,基本上用完全日都唔使再補妝。





Tom Ford 仲有好多優惠套裝,大家快啲約埋親朋好友去 SOGO Thankful Week 嘅 TOM FORD 專櫃選購喇﹗


#明星氣墊粉底套裝 #SOGOTHANKFULWEEK2022 #TFFACE #TOMFORDBEAUTY







 

2021年12月23日 星期四

最近天氣開始凍咗好多,成日都好想食羊腩煲暖吓身,比我發現屋企附近「金多寶」海鮮私房菜啱啱推出咗一款砂鍋麻辣羊腩煲,一向鍾意食辣嘅我,當然唔會錯過喇﹗呢間私房菜位置好近楓樹街球場,出面就咁望好似一般茶餐廳,不過佢有做海鮮火鍋放題,百幾蚊任食,所以平時都有唔少街坊會去幫襯。




入面裝修非常平民化,可以話係高級少少嘅大排檔格局,座位方面大約有6張枱左右,坐低都唔算太迫夾,餐具同環境都唔太差,如果大家有興趣想試,最好都係book定枱會比較好啲。



餐牌上面都有唔少食物選擇,不過有啲菜式同湯水就要提早預訂,所以大家book枱嗰陣最好同餐廳溝通一吓會穩陣啲,費時去到叫咩無咩,影響食飯心情。今次主要想試個砂鍋麻辣羊腩煲,所以另外都叫咗幾款小菜。




餐牌上面見有推介呢款黃金鮮魷,一向都好鍾意食香口食物,所以見佢有推介就點嚟試一試。上菜一睇,無咩點擺碟,不過色澤都唔錯,而且即叫即整,食嘅時候都仲熱辣辣。



咸蛋黃味都幾出,唔算太咸或者太淡,而魷魚方面好新鮮彈牙,又夠肥美。不過就唔係話勁脆身嗰種,兩個人食嚟講份量都算多,最後都有食剩少少,總括嚟講都可以一試。




到主角砂鍋麻辣羊腩煲,一開頭仲以為同平時啲羊腩煲咁會有個爐煲住,但原來唔係,只係會上個砂鍋,要打邊爐的話,要另外要求。個砂鍋麻辣羊腩煲入面有枝竹、有啲蔥、有少少菜,但就無跟生菜。



一煲入面有10舊羊腩,每舊都有細骨位,脂肪同肉嘅比例都唔錯,而且炆得夠腍,味道方面都幾香濃,而且唔係好辣,食唔到辣嘅人都可以接受到,而鍾意食辣嘅朋友就記得一定要加辣。枝竹好入味,連啲配菜都幾好食。3百幾蚊嚟講份量係ok,不過我都係鍾意有個爐熱住食正啲。




另外,見到有我最鍾意食嘅干扁四季豆,於是都點咗一份。我同老公都覺得呢個餸做得好出色,味道好香口,辣度又夠適中,而且入面仲有啲蝦乾,配白飯真係一流。








 

2021年11月13日 星期六




最近工作比較忙,好長一段時間都無分享自己嘅護膚心得,不過呢幾個月我一直用緊呢支CLARINS Double Serum 賦活雙精華,仲不知不覺用到空瓶添﹗老實講,我屋企有差唔多30-40支精華,支支都用到一半已經放埋一邊,可以用到空瓶而又想回購嘅真係唔多﹗開頭買呢支 Double Serum 賦活雙精華,係因為好多Youtuber、明星同美容編輯都有推介,之後到自己用過之後,真係有一種深深俾佢吸引嘅感覺,想知有咩原因令我咁愛佢,咁就要繼續睇落去喇﹗



 
大家可以見到啱啱揼出嚟嘅精華,有透明同金黃色兩部分,係因為CLARINS Double Serum採用咗 「水+油」 黃金配方,完美揉合21種高效水溶性&油溶性修護植物萃取,極致發揮5大細胞修護功效:再生、滋養、保濕、活氧&防禦,雙倍激發肌膚修復力量。




輕輕推開精華,水+油配方會立即揉合埋一齊,質地好水潤,一啲油膩感都無,用完皮膚一啲都唔笠,反而保濕又清爽,即使化妝前用,都唔會令底妝起擦膠碎,完全係零負擔。如果有啲朋友用唔慣呢種質地,建設可以試下細細plump咁搽, 逐少逐少加上去,慢慢搵返適合自己肌膚嘅質感。




Double Serum仲有一個特點,就係佢獨有雙管設計,大水滴就係水,而小水滴就係油,將「水+油」雙精華配方以2:1親膚黃金比例調製,等啲精華可以更快滲入到肌底。




我自己好鍾意配合埋按壓手法去搽呢支精華,利用手部嘅熱力,可以令精華吸收得更加快,仲可以提升輪廓同減淡細紋。詳細按壓手法可以參考:https://www.youtube.com/watch?v=MNSOvTLw6uw



質地好舒服,好適合一年四季都用,特別係最近轉季,一踏入秋冬,皮膚特別乾燥,搽完之後,即時可以見到皮膚有返光澤,而且仲非常保濕。我習慣早晚潔面之後,就會即刻搽呢支精華,搽完之後再直接搽埋面霜,唔需要按太耐已經完全吸收曬喇﹗




用完一星期之後,我發現自己嘅皮膚水潤細緻咗,仲減淡埋虎紋同細紋,皮膚更加緊緻,毛孔都收細埋,明顯又彈又滑,望落都無咁顯老添﹗就係因為效果太明顯,所以我就成日keep住用,不知不覺成支用到空瓶添呀﹗




購物禮遇: CLARINS專櫃及官網現已推出3款賦活雙精華節日限定「買1送3」套裝,適合不同肌齡嘅選購,只需$900就能擁有1支50ml Double Serum,以及2款指定皇牌禮品連1個精美化妝袋! 另外,仲有更多Double Serum優惠套裝喺官網及專櫃發售添。   Link: https://bit.ly/3wzJjAd


2021年11月2日 星期二

話說收到第二期政府消費劵之後,我就開始蠢蠢欲動,購物慾不斷大增,但我由10月一直忍手唔用呢筆錢,原因係我知道11月就係一年一度嘅 Sogo Thankful Week,每年呢個時候,我都會將我平日抑壓住嘅購買慾,一次過發洩出嚟,感覺真係勁爽㗎﹗



一直我都係 Tom Ford 嘅忠實粉,每年Sogo Thankful Week 我都會襯住有優惠去入定貨。今年由  10 月 27日至 12 月 5 日期間,Tom Ford 推出多款香水、化妝品及護膚產品精選套裝優惠,當中除咗由韓國人氣男神玄彬代言嘅 Oud Wood 及 Soleil Brulant 私人調配香水、LOST CHERRY 限量版 氣墊粉底連補充裝外,亦包括能締造高級感妝容 SHADE AND ILLUMINATE 立體柔光粉底液、以粉質幼滑而聞名的經典四色眼影盤等多款皇牌產品,真係非常之吸引呀﹗



今次 Thankful Week 亮點就係呢支最新推出 Most Wanted 裸棕唇色系列,可以打造出常見嘅時尚中性裸唇妝造型,特別首推大熱 #100 Equss & #01 Insatiable ,另有限量新色 #03 West Coast & #N2 Dolce 。


咁多色唔知邊支啱自己﹖宜家大家仲可以隨時透過最新AR虛擬唇妝體驗,輕輕鬆鬆坐喺屋企,已經可以率先一試秋冬大熱唇色。

Link: https://www.youtube.com/watch?v=qbIltgPlNu0



裸棕色系列色澤濃郁高級,霧面質地絲滑持久,既富時尚又充滿型格感,再次為裸唇寫下新定義,有極為襯膚的色澤以及無比奢華嘅質地。紅色包裝最適合聖誕節同新年用,Tom Ford 唇膏真係買極都唔會覺得厭,支支顏色都充滿住驚喜﹗


絲滑質感好易上色,而且滋潤又唔顯唇紋,搽完令個嘴唇好立體,而且今次選擇嘅顏色仲好顯白添,秋冬妝用呢種質感同色澤真係好適合呀﹗



Tom Ford 裸棕色系列唇膏,除咗顏色選擇多又夠顯色之外,佢仲非常持久。宜家成日要戴口罩出街,有時覺得搽完唇膏之後,會沾到成個口罩污糟曬,用呢支唇膏就唔會有呢個問題,搽完之後,除咗口罩都唔會成個唇妝花曬同面青口唇白。



今年 Tom Ford 推出咗紅噹噹嘅 LOST CHERRY 氣墊粉底連補充裝,每次推出限量版粉盒我都會忍唔住買,因為每一款都又靚又型,就算唔用,我都會用嚟儲或者放喺化妝台作為裝飾。



LOST CHERRY 氣墊粉底會配埋紅色絨布袋,可以用嚟保護個case,放喺手袋都唔會咁易刮花同整污糟,真係好貼心呀﹗一set已經包咗粉芯、粉撲同case。




Tom Ford cushion 質地好易推,貼服又持妝,用完唔厚粉之餘仲充滿光澤感添﹗遮瑕度屬於中上,可以遮到毛孔、紅印同色斑。出完一日街返到屋企,膚色都無變黃或者變灰,而且控油功效唔錯,基本上用完全日都唔使再補妝。




一直都好想入手Tom Ford 眼影,今次出咗特別版就入手我嘅第一盒喇﹗今次選擇咗大熱EYE COLOR QUAD,以啡色大地tone為主,基本上咩場合都啱用。




一盒有四隻色,左上角一格係打底用,之後會用右上角一格搽喺上眼簾同下眼線位置,再用左下角一格搽喺上眼簾尾部位置,就完成我平時最常化嘅眼妝。眼影顯色度高,又夠貼,用好少已經足夠,重點係無飛粉問題,唔會搞到眼妝好污糟。




真心已經有2個月無化過全妝,買完成套 Tom Ford 產品即刻化返個全妝同老公去街街。SOGO Thankful Weeks 優惠已經開始喇﹗TOM FORD 嘅香水、化妝品&護膚產品都推出咗精選套裝&體驗裝,我就有以下幾款心水推介,大家都快D去門市或者 E-shop 選購喇﹗ 

LOST CHERRY 限量明星氣墊粉底補充裝套裝 HK$1235 (原價 HK$1685)
~LOST CHERRY 氣墊粉底補充裝 
~限量版 LOST CHERRY 櫻桃粉色霧面氣墊粉底皮套 
~迷你妝前乳 5ml 香水體驗裝 2ml


LOST CHERRY 系列限定唇膏及香水套裝 HK$475 (原價 HK$665)  
~LOST CHERRY系列限定唇膏 #16 SCARLET ROUGE 
~TOM FORD RESEARCH 精華修護液 15ML 
~香水體驗裝 1.5ML
高級定制四色眼影盤套裝 HK$750 (原價 HK$850) 
~高級定制四色眼影盤 #20 Disco Dust 
~啞緻遮瑕粉底液體驗裝 4ML

Tom Ford 有咁多優惠套裝,大家快啲約埋親朋好友去 SOGO Thankful Weeks 2021 嘅 TOM FORD 專櫃 / E-store 購買優惠套裝!

2021年7月30日 星期五

一直都好鍾意日本品牌 THREE 嘅產品,佢哋包裝簡約自然,又不失高端感。而且仲透過植物嘅大自然力量,令心靈、身體、肌膚三方面都得到平衡&滿足。曾經用過品牌嘅粉底液同埋潔顏油,無論質感、功效同味道都令我好難忘。



今次我就試咗佢哋另外3款產品,包括:THREE BALANCING CLEANSING OIL GEL 平衡潔膚蜜、(全新)THREE BALANCING FOAM R 平衡洗顏慕絲R、THREE Solar Tinted Glow Flow 艷陽全效UV粉底液。



THREE BALANCING FOAM R 平衡洗顏慕絲R HK$350/150mL

每日護膚最重要嘅環節一定係潔顏,因為空氣入面有好有污染物同塵埃,佢哋會吸入我哋嘅皮膚入面,喺皮膚表面形成角質層,令到毛孔閉塞,搞到好易會有黑頭、粉刺同暗瘡,而且角質太厚,就算搽幾多靚產品都會吸收唔到,積聚曬喺皮膚表面,反而會引起油脂粒問題添﹗



平衡洗顏慕絲R 蘊含98%天然成份,仲注入多款精華油,質地好Creamy,唔使加水已經有好綿密嘅泡泡。



我早晚都會用佢嚟清潔皮膚,先濕一濕塊面,之後按出2泵份量,輕輕喺皮膚上面打圈按摩,之後過水就已經可以。平時用泡沫狀嘅潔面產品都會覺我勁乾,但呢款產品用完除咗好乾淨同亮澤之外,皮膚keep到好水嫩,仲一啲刺激嘅感覺都無呀﹗





THREE BALANCING CLEANSING OIL GEL 平衡潔膚蜜 HK$375/100g  

蘊含複方植物油、白泥、摩洛哥堅果殼3項潔淨成分,有效卸除彩妝產品之外,仲可以潔淨埋環境所帶來嘅污染物,有效減少角質層,令皮膚得到平衡同健康。



質感好特別,好似吉士達忌廉一樣嘅凝蜜質地,喺皮膚上面輕柔就會轉化成油狀,有效溫和地潔淨彩妝髒污、皮脂污垢、改善阻塞毛孔以及粗糙且暗沉嘅肌膚。




THREE Solar Tinted Glow Flow 艷陽全效UV粉底液 SPF50+/PA++++  共7色  各HK$425/ 30mL


由於疫情關係,宜家成日都會長時間戴口罩,所以選擇底妝產品都會偏向鍾意一啲清爽型嘅產品,而且最好唔駛搽太多嘢喺皮膚上面就最Perfect。艷陽全效UV粉底液一枝就可以做到makeup base、foundation同防曬霜,完全可以滿足到我嘅要求。




艷陽全效UV粉底液質地好水潤,用次前一定要搖一搖,我自己就鍾意1號色,偏向粉紅色嘅膚色tone。



直接用手指搽或者用化妝掃上都會好易推,好貼皮膚,而且仲有修飾瑕疵、提亮膚色嘅功能。





搽咗一層已經可以見到皮膚狀態非常好,貼薄、自然又清爽,夏天用真心一流﹗而且我實測過用完大半日都無咩點脫妝同出油,佢嘅防水防油功效非常好。