為食妹出動啦，成日聽朋友講起旺角有間樂天大喜屋放題超正，所以book左枱同好姊妹去尋食。我地book左夜晚8:45分個場，一去到已經超級多人係度排曬長龍，都唔知佢地做咩要排曬係度等入場﹖明明就已經訂左位，怕咩呢﹖
好準時開門，所有人好似衝關咁衝入去，都唔知發生咩事﹖個個都超心急，好似驚死蝕本咁樣囉﹗哈哈
限時食2個半鐘，大把時間食，飽死都未夠鐘啦﹗我地兩個一於少理，慢慢黎。
打開兩本落單簿，有A-N頁，選擇超級多，睇到我地心花怒放呀﹗我未食過一間放題有咁多選擇囉，感覺非常良好，岩曬我地兩個眼闊肚窄的小女生。
食放題識食一定食左刺生先，選擇好多，不過我地兩個都唔太喜歡食魚，所以點左好多帶子、甜蝦、極大赤蝦、八爪魚同三文魚。
極大赤蝦比甜蝦大隻少少，兩個種類都好新鮮，不過如果要兩選一，我會選極大赤蝦，因為貪佢大隻D，哈哈哈﹗不過佢地始終唔夠帶子好味，我不停叫完又再叫，食到超滿足的﹗
壽司方面好多款式選擇，我樣樣叫左一兩件，又整得幾靚播，重點係D飯好少，唔會咁易飽曬，值得一讚﹗
牛油粟米好甜又唔會好乾，推介﹗
炸物方面，都係樣樣叫左少少，即叫即整，黎到仲熱辣辣。日式甜薯好正丫，不過食太多驚太飽，所以食少少算啦﹗
蒜香炒野生雜菌，呢個正丫，不過油左少少，但係味道就一流，好難取捨囉﹗
櫻花蝦炒飯好正，飯唔會炒到太乾，味道好濃郁，非常推介，不過食完勁飽。
極品煮鮮鮑個名好吸引，叫左黎試下，一人一碗，味道幾鮮下，可以一試﹗
燒菠蘿我個人認為乾身左少少，不過菠蘿都幾甜。
是次兩人消費總共HK$520，二百幾蚊有咁樣嘅質素，其實仲想點丫﹖我覺得好抵食囉﹗
沒有留言 :
張貼留言