值得一試的三喜「秘制奇味雞煲」

有日同好姊妹去開佐敦行街買髮型用品，行行下不知不覺已經到左食晚飯嘅時間。我老公就突然話好想去食雞煲，咁我地唯有行去文蔚街果邊搵下有無雞煲食啦﹗行行下見到呢間三喜，個招牌上面大大隻字寫住雞煲火鍋，於是就是但行左入去試下啦﹗

餐廳裡面環境都算幾大，裝修感覺好似一間茶餐廳，不過環境同衛生都好似唔錯。

我個姊妹其實就唔太喜歡食濃味野，咁老闆娘就推介我地食呢個「海南椰子雞煲」，佢話呢個主要係飲D湯為主，不過好姊妹都好想試，所以就點左一煲。

椰子雞煲裡面都幾足料，D湯真的勁鮮甜，而且有一陣陣椰子香味，大家都不停係咁飲D湯。不過雞肉方便就老左D，而且無咩味，所以老闆娘無講錯，椰子雞煲真係主要係飲湯，重點唔好放錯係D雞度呀﹗

咁我老公同好姊妹個男朋友兩個都喜歡比較濃味同香口D嘅野，咁老闆娘就介紹我地點「秘制奇味雞煲」，佢兩個仲要求要中辣，我都有D驚太辣會食唔到。點知個煲一黎，陣味真係勁香，搞到我好想食囉﹗連我個姊妹都忍唔住要試，可想而知陣香味有幾吸引呢﹗

我地點左半隻雞，份量都算適中，雞肉嫩滑又入味，中辣竟然唔算太辣，而且唔會有麻的感覺，只有香辣味，所以連我同好姊妹都食到津津有味﹗

兩個男人都要求要食牛肉，於是點左份細嘅手切安格斯肥牛比佢地，一黎到大家嘅反應係，嘩﹗呢碟已經叫做細，唔係掛﹖

份量超多囉，片牛肉仲要唔係好薄個種添，但只係HK$108，去邊度搵呀﹖肉質方面脂肪比例均勻，色澤感覺新鮮，至於口感真係好嫩滑，牛肉味道香濃，呢個超級推介比喜歡食牛肉嘅朋友呀﹗

帶子迷嘅我要求要點一碟鮮帶子，帶子係珍寶size，切成片狀，厚薄都算幾適中。鮮帶子熟左之後，肉質好鮮甜爽口，真係無點錯野，好味道﹗

另外，三喜仲有小菜食，我地望一望個餐牌見到廚師推介呢個蜜椒大蝦球，於是就點左黎試下。一碟份量真係超多，可以話大件夾抵食。

至於味道方面感覺係酸酸甜甜，外面個層有炸過，不過唔係脆口嘅，我諗應該係想香口D者。蝦都真係算幾大隻，而且肉質都算新鮮，口味都幾特別嘅係。