近幾日Sogo Thankful Week就同好姊妹去勁掃貨，點知買下買下就忘記左時間。瘋狂購物後已經體力耗盡，而且仲超級肚餓，於是立即諗起之前朋友介紹嘅一間餐廳叫做「西餐大排檔」就係Sogo附近，所以就走左上去食啦。由於當時已經成晚上9:00，所以餐廳裡面唔算多人，等都唔使得就立即有位坐，lucky。
一入到餐廳就見到佢地有張吧枱，仲諗住飲返兩杯，點知原來佢地無酒飲，但好彩佢地有mocktail飲，咁都無咁失望。
點左杯叫strawberry baby嘅野飲，賣相都唔錯。味道方面就淡左少少，不過問返先知原來成杯飲品都係用新鮮士多啤梨打汁而成，無加糖水，所以味道會比較fresh，唔會好似飲糖水咁。
首先當然叫左個迷你海鮮拼盤，開頭仲以為好細盤，點知一上枱即刻嘩左一聲，佢指嘅迷你根本一D都唔迷你囉。用料好新鮮，所有刺生都好鮮甜，而且肉質好彈牙，一食就知唔係急凍海鮮，超級推介﹗
見到餐牌上面有個叫做礦泉水火鍋套餐，覺得好新奇，於是叫左一份黎試下。開頭其實都幾擔心礦泉水做湯底會唔會無味又好淡，不過無計，我同我個姊妹都係好奇寶寶，所以唔試過我地一定唔會死心架。
打開個煲，裡面有D菜同幾片金華火腿，之後將成枝礦泉水倒入去。店員教左我地正確食嘅步驟，首先佢已經將火鍋食材順先後次序放好，然後我地就由內而外嘅食材開始食，咁最後就會得出好鮮甜嘅湯。食材方面有日本帶子，超級大隻又新鮮，食到我唔停得口。鮮魚柳無腥味，連我平時唔太喜歡食魚都覺得好彈牙同鮮甜。鮮蜆洗得好乾淨，無沙係裡面，肉質爽脆。西班牙黑毛豬，我覺得佢切得有D厚，不過食落D肉好淋。美國牛肉脂肪比例剛好，入口即溶，好味道呀﹗仲有日本年糕，我個人唔太喜歡，不過我姊妹話唔會好黏口，反而係爽口的。
由於我好鍾意飲蟹肉湯，所以點左一客蟹肉濃湯配鮮蠔杯。個湯用料十足，裡面超多蟹肉，味道香濃，賣相又靚。另外個鮮蠔杯隻蠔好新鮮，而且連埋配料一切食，正到難以形容。
檸檬智利深海鱸魚柳，材料好新鮮，而且鱸魚肉質好鬆軟，不會有很多配料的味道，能夠保留住鱸魚的原味。
慢燒美國牛肉眼，份量十分，而且生熟的控制恰好，肉汁豐富，而且入口鬆軟，推介。
甜品方面點左原隻菠蘿雪芭，雪芭好滑口，而且入口感覺清新無比。味道方面酸酸甜甜的，飯後食佢可以有消滯的作用。
是次消息每人約HK$800，這個價錢能夠食到這樣有水準的食物，實在值得。
沒有留言 :
張貼留言